بالعامي الفصيح ….( بقلم \ طارق فريد

بالعامي الفصيح ….( بقلم \ طارق فريد
ساعات كده بنحس بحاجات… نيجي نترجمها لاحاسيس مانعرفش لكن تحس بتوهااااان كانك شارب حاجة لمؤاخذة.. والاغرب بقا انها بتكون احاسيس منكوشة وملخبطة كانها سمك -لبن – تمر هندي – لكنها لذيذة ..
وممكن كمان تنام تحلم بحاجات تكسف لما تصحا منها وتخليك تضحك وبقمة السعادة . في ناس بتقولك الحاسة السابعة ملكة روحانية موجودة بالنفس البشرية وعقلك الباطن هو اللي بيسير احلامك تجاه الجانب اللي انت بتحبه حتى لو كان حلمك ده كابوس .
اما الاحلام اللي بتتحقق محتاجة نفس بشرية صافية اوي.. نقية اوي.. مؤمنة اوي .. ياسلام على عقل الانسان وتخيلاته واوهامه عالم تاني خالص عشان كده الاديب والمفكر والعبقري ساعات بيقوله عنه انه ضرب وعقله لحس ..
كتير من علماء النفس بيحللوا شخصيات لكن الحقيقة الاكيدة ان علم النفس فشل في وضع ضوابط عملية وعقلية ومادية للانسان لدرجة انك تحس انه كلام في كلام وكلها نظريات وده معناه ان العقل البشري اكبر من اي علم ويقدر يخدع اي علم حتى المحلل النفساني ده يقدر يمثل عليه ويخدعه ..
درب عقلك كويس فكر واتخيل اي شئ بتحبه قدامك وعيش احساسك بيه مؤكد حتوصله بيوم من الايام وحتنجح لان عقلك عقل انسان اكبر من اي عقول الكترونية واقوى من كل اجهزة كشف الكذب ..حب نفسك .. مش عيب .. عشان تقدر تحب حياتك وتحب وتسعدغيرك كمان ولو فكرت كمان شوية ومن غير زعل حتلاقي الحب نفسه عبارة عن مصلحة مشتركة حتى لو كانت بين الاحاسيس فالاحاسيس ايضا تشعر .. وتعيش .. وتحس وتنمو والدليل على كده انها ممكن اوي تتبدل فلا يوجد مايسمي بالعشق الابدي الا باحاسيس مشتركة تربطها مصالح ابدية … …( .. طارق فريد.. )
 

نبذة عن الكاتب

مقالات ذات صله