آخر الأخبار

الحالة السيكولوجية التى يعيشها الانسان مع نفسه

الحالة السيكولوجية التى يعيشها الانسان مع نفسه

مصطفى السبع

لابد من التعامل معها بحكمه واقتدار وهذا وصف لإنسان عاش حياته بين الحقيقة والخيال انسان فكر مع نفسه ان يكتب قصة تجاربة مع الحياة وبدأ يكتب كل مايشعر به فى الخير ونقيضة الشر ويقف امام المرآه ويشاهد ويختبر نفسه ماذا سيصبح لو عاش فى الخير ؟…..وماذا سيصبح لو عاش فى الشر؟ .

وبدأ يسطر ويتخيل حقيقة الأمر من خلال تلك هذه النقاط الآتية التى تعيش معنا بالفعل فى حياتنا وخصوصا ان كلا منا يتحدث عن الخير الذى يعيش بداخله…

■تعالو نستعرض خطوات الحياة بالطريقة العامية السهله التى تصل للجميع .

●انا عمرى ما كرهت حد…ليه الناس بتكرهنى.
●انا عمرى ما غيرت من حد..ليه الناس بتغير منى.
●انا عمرى ما كان فيه حقد فى قلبى لحد..ليه الناس بتحقد عليا.
●انا عمرى ما انشغل بالى بحد…ليه الناس شغله بالها بيا.
●انا اى حاجة بعملها زى الناس واقل شوية ..ليه الناس دايما مستكتره عليا الحاجة دى اعملها..
●انا طول عمرى مش كذاب ولا منافق…ليه الناس مش مصدقين كده.
●انا طول عمرى ما اغتبت حد …ليه الناس دايما بتغتاب فيا.
●انا طول عمرى عندى قناعه باللى انا فيه …ليه الناس مش فاهمين كده.
●انا طول عمرى ما أذيت حد …ليه الناس بتحاول تأذينى
●انا طول عمرى مستور وربنا ساتر عليا…ليه الناس عايزه تكشف ستر ربنا عليا ومش سيبانى فى حالى.
●انا طول عمرى محافظ على مظهرى الاجتماعى ..ليه الناس بتحاول تشوه مظهرى .
●انا انسان اجتماعى ودود بحب الحياة ..ليه الناس بتحاول تحبطنى وتكرهنى فى الحياة.
●انا طول عمرى احب اهلى وعائلتى وجيرانى واصدقائي ..ليه هما ناظرين ان حبى ليهم حب مصلحة وخلاص.
●انا طول عمرى ناجح فى عملى بمجهودى…ليه الناس مش مصدقة وبتحاول تنسب نجاحى ده لاشخاص أخرى.
●انا طول عمرى متسامح …ليه الناس مش متسامحه معايا.
●انا طول عمرى بضحك للناس من قلبى….ليه كل الناس بتضحكلى من ورا قلوبهم .
●انا طول عمرى امتلك حسن النوايا….ليه الناس نيتها سيئة بالنسبالى……
●انا طول عمرى احب القيم والاخلاق والمحافظة عليهم
ليه كل الناس بتحاول تعكس ده كله معايا علشان يقولوا انى معنديش لا قيم ولا اخلاق…
●انا طول عمرى عاطفى …ليه الناس بتتريق عليا وتقول ده تمثيل..
●انا طول عمرى عندى هواية حب للشعر والكتابة… ليه الناس بتحاول تقف فى طريقى ومضايقه منى وبتحاول تمنعنى من الكتابة…………
●انا طول عمرى عارف حدودى ولا اتخطاها ….ليه الناس شايفانى انى متعدى حدودى دايما.
●انا طول عمرى بحترم الكبير والصغير…ليه الناس شيفاه انه جبن منى ويقولوا عليا جبان.

نعم كل هذه النقاط احاسيس دايما بنحسها جميعا ومفيش حد فينا بيطلع نفسه غلطان طيب ياريت بجد الكلام ده يطلع صح
ولو صح هنطلع القمر وهنحقق كل اللى بنتمناه معقولة مفيش حد اخلاقه سيئة معقولة مفيش كره معقولة مفيش خيانه معقولة مفيش حقد معقولة مفيش كراهية معقولة مفيش حد فاشل معقولة فيه امان للدرجة دى ياسلام لو فعلا يبقى فيه كده …
طبعا انا بحلم وطبعا كل الكلام اللى مكتوب فوق ده ناس بتعيش معاه وتقول زى ما بقول كده انها فعلا نفسها يتحقق وناس تقول الجدع ده بيهرى على الفاضى ده غير ان فيه فعلا ناس بتضايق انى بكتب وبتشوف ان فيه ناس بتؤيدنى فى منشوراتى وكتاباتى ..
علشان كده صدقونى يجب التغييير من جوانا يتغير الى الافضل وياريت نقف عند كل موقف يحصل معانا من اى نوع ونفكر فيه شوية سواء كان موقف مفرح او موقف محزن ولو موقف مفرح يبقى نفكر ليه الموقف ده فرحنا من القلب علشان نفضل فرحانيين ونعيش على نفس الموقف والمواقف المتشابهه له.
ولو موقف محزن يبقى ايضا لابد من ان نقف ونفكر لماذا اصابنا الحزن من هذا الموقف وماهو علاج هذا الموقف حتى لا نحزن مرة ثانيا او نستشعر منه بضيق وتعب نفسي..

كل انسان لابد ان يجعل لنفسه محطة مهمه فى حياته يقف عندها حتى يشاهد ماذا يفعل ويقرر ويضع جميع افعاله امام عينه وهل هو راضى عنها ام لا وحتى لو وصلنا لنصف الطريق برضوا دى حاجه كويسه لاننا حاولنا ان نتغير للأفضل وفكرنا كيف نصنع من انفسنا نموذج نفتخر به ونتشرف به ونضع على صدرونا وساما للشرف والامانه حتى نعيش حياتنا بكل امانة وحب وسعادة .

نبذة عن الكاتب

مقالات ذات صله